काठमाडौं : अमेरिकी सरकारले अवैध रूपमा बसोबास गरिरहेका ठुलो संख्या नेपालीलाई निष्कासन (डिपोर्ट) गरेको छ। अमेरिकी चार्टर्ड विमानमार्फत फिर्ता पठाइएका उनीहरू आज (आइतबार) अपराह्न त्रिभुवन अन्तर्राष्ट्रिय विमानस्थलमा अवतरण गर्दैछन्। यो अमेरिकाबाट एकैपटकमा डिपोर्ट गरिएको अहिलेसम्मकै सबैभन्दा ठूलो नेपाली समूह हो।
त्रिभुवन अन्तर्राष्ट्रिय विमानस्थल अध्यागमन कार्यालयका प्रवक्ता अञ्जन न्यौपानेले नेपालीहरूलाई डिपोर्ट गरिएकोबारे दूतावासमार्फत एक साताअघि नै जानकारी आएको पुष्टि गरे।
यद्यपि, विमान अवतरण नभएसम्म डिपोर्ट हुनेहरूको यकिन संख्या भन्न नसकिने उनले बताए। ‘हामीलाई प्राप्त पत्रमा उनीहरूले अमेरिकी आप्रवासन कानुन उल्लंघन गरेको उल्लेख छ, तर प्रवेशको प्रकृति वा अन्य कारणबारे स्पष्ट खुलाइएको छैन,’ न्यौपानेले भने।
राष्ट्रपति डोनाल्ड ट्रम्पले दोस्रो कार्यकाल सम्हालेपछि कडा आप्रवासन नीति लिएसँगै अमेरिकाबाट डिपोर्ट हुने नेपालीको संख्या ह्वात्तै बढेको छ। अध्यागमन विभागको तथ्यांकअनुसार सन् २०२५ को जनवरीदेखि मे महिनासम्म मात्रै १४० जना नेपाली डिपोर्ट भइसकेका छन्। जसमा जनवरीमा ६, फेब्रुअरीमा २०, मार्चमा ३०, अप्रिलमा २६ र मे महिनामा ५८ जना थिए।
यो संख्या विगतका वर्षहरूको तुलनामा निकै बढी हो। विभागको तथ्यांकअनुसार सन् २०२१ मा ३५, सन् २०२२ मा २२, सन् २०२३ मा २४ र सन् २०२४ मा ५२ जना नेपाली अमेरिकाबाट डिपोर्ट भएका थिए। डिपोर्ट हुनेहरूमा अधिकांश दलाललाई मोटो रकम बुझाएर अवैध मार्ग हुँदै अमेरिका प्रवेश गर्नेहरू रहेका छन्।
विमानस्थलमा अवतरण गरेपछि अध्यागमन कार्यालयले उनीहरूलाई नेपाल प्रहरीको मानव बेचबिखन अनुसन्धान ब्युरोको जिम्मा लगाउनेछ। फर्काइएका व्यक्तिहरूसँग उनीहरू कसरी अमेरिका पुगे, कोमार्फत गए र दलालबाट ठगिए/नठगिएकोबारे सोधपुछ तथा परामर्श गरिनेछ।
